Go to channel

قصص وروايات عراقية

12
هاي امي اذا صدك راحت لهناك اني وين اروح ، قابل نفترك اني واخواني ، شمسويه الها قابل وتحجي عليه هيج ، غير بيت ابوي ماريد اطلع منااا .. اكو واحد يعوف بيته ومكانه واهله وناسه ويروح يم غرب ، شعدنا قابل يم عمي؟ زين اذا راحت صدك هنا شلون ، مينا تروح لو كرار ، اذا عندت ومارحت وياها خما اضل يم عمتي ، هم صعبه ، بلعت الغصه كوه شاابعه قهر .. غفيت بمكاني على الف فكره والف هم ، حسيت على غطى تخلى فوكي ، جريته غطيت حتى راسي ونمت ، ماعرف شكد مر وقت وحسيت على نفسي ، اسمع صوت عمو رضا وعمتي يحجون ، وصوت خواشيك جنهم ياكلون ، استحيت اكعد واكل وياهم برغم ميته جوع ، على ريوك غيره مااكلت شي .. اسمع ام رضا تحجي لعمتي يعني مرت اخوج راكبه راسها تروح لكربلاء .. - عمي رضا كالها ترى هم حقها مره بحدها ، شدبر العيشه لو تربيه جهال .. - روح شوف الارامل ، كلمن عدها درزن ماحجن ولا فكن حلكهن شو بس هيه عاطت منهم .. -صعبه يابه ، جان رجال لام البيت هسه صفت بحدها هيه وجهال ، هذول يرادلهم خلك .. -ردت عمتي الي يسمعك يكول عدها عشره ، هنه عنكورتين افقر منهن ماكوو ، عدك بس شوي لتين تعاند بس هم مابيها اذيه ، من تحجي وياها بعين واغاتي تجي وياك لادرب .. -خما تطبكين ويه بنت على امها ياانسرين .. - لا اطبك ولا شي ، بس روحتهن هنااك غلط ، بيت ابوهن موجود شعدهن هناك بالغرب شندري شنعرف عنهن هناك .. -سالفه بيد امهن ، ماتكدرين تدخلين بعد ، واخوج هم امبين قافل خاصه من حجيت وياه شفتي شلون نترت علينه ، ويهدد الي يدخل مايلام غير نفسه .. - الله لاينطيها ماصدكت راح ناظم تفرعنت هالحيه .. - لاتحجين هيج جدام بناتها نسرين تبقه امهن .. -والله محد كاسر ظهري غير جهال ناظم ، شلون وين اوديهم ، هم مااكدر اخليهم يمي هم اداعي بيهم امهم وتريدهم .. اسمعها تجر حسرات ومقهوره ، ودردم على امي وتذم بيها ، عمي رضاا يكللها ملاج شغل خلي تاخذ بناتها وتروح ،هيه ادره بمصلحتهن واذا مارادن يرحهن هلاا بيهن اخليهن بعيوني .. ضليت خانسه ، وين اويلي يااربي ، كرفصت نفسي وماتحركت بالنص ساعه بمكاني صاحيه بس مااكمت ولا حسستهم ، وره ماطلعو من صاله يله وخرت غطاا ، كمت لحيلي ارجع لبيتنه ، دنيا ليل ، كلت ابات هناا اليوم وباجر اروح .. طلعت عمتي من مطبخ شافتني ، كالت هاا ترحين لامج .. كتلها ماريد اروح ولا اريد اعوف بيتنه عمه ماريد اعوف ديالى .. جرت نفس مدمعه تمسح بديها بملابسها شبيدي عليج يااعمه اني هم مو امجن .. زينب هم تكول اناا امهن شلج لازم وذاك عمجن اناا ماراضيه الله يشهد موت اهون علي ولا فركاجن .. بس تعااي انطيني حلل .. - ابقي يمج عمه ماروح . - هلاا بيج عين غطاا وعين فرااش مااقصر عليج الله يشهد بس واخوانج شلون .. - بكيفهم يردون امي يردون يضلون هناا .. - قابل تضلون هناا يااعمه بلا ام ولا اب .. سكتت افر بعيوني ضاايعه شسوي ، كالت روحي صبيلج لكمه اكلي عمه الله كريم مناا لباجر .. عافتني ومشت لغرفتها ، كعدت بالمطبخ صافنه ، طلعت خبز وخيار ولفتيه اكل مالي نفس لا بالتمن ولا مرك .. دخلت ام رضاا جانت بره من شافتني حجت هاا جاي تاكلين .. هزيت راسي اي .. - عليش'ياايمه مزعله امج هم تبقه امج عيب منها عافتها وجايه هناا .. - رفعت نظري عليها مارديت انتظر تحجي .. هزت اديهاا الله يعينج ياازينب والله صدك خلفه بنات تشلع كلب .. دنجت اكل بالفه مارديت الي بيه مكفيني وجاي تكوم عليه مغثه هااي .. تالي شافتني مانطيتها نجده عافتني ومشت ، وراها ضليت يمهم تقريب يومين ، واجت مينا عليه تكلي ردي ترى امي حتى ممهتمه ، وكالت لعمي اذا تريد تظل خليها يم عمتها بعد احسن .. -وشرد عليها عمج .. - ماقبل كال كلهم يجون ويانه ، مو بكيفها تضل هناا على اي اساس تضل هناا ... حاجتها عمتي مو بكيفهم شنو هيه كوه خما كوه .. -بعد بكيفج عمه امي مقرره وخلص ، واني مااكدر اضل هنا يمكم ، انتو هم بيا حال تحيرون بينه شنو ذنبكم ، امي مااعرف بشنو تفكر بس الي اعرفه مااكدر اعوفه هيه وكرار نروح يم عمي ونجرب ونشوف .. حجيت ، اني عن نفسي ماارروح .. اني هم ماعدي نيه تعرفين انتي كلش زين الي بكلبي بس امي هم مااكدر اعوفها .. للمغرب اجه عمي يقنعني اروح وياهم وهم ضلت بكلبي الضله هناا قافله .. كعد هو وعمي رضا يتفاهم وياه ويحجي وياه انو اذا ماعجبتهن كعده هنااك يرجعن يمكم واني اتكفل مصاريفهن بس مال يبقن هنا بس نسوان صعبه واني مااكدر يوميه رايح جاي هناك على الاقل جوه عيني وقريبات علي .. وحتى دوامها انقله هناك يمنه وبيت لكيتلهم مشتمل بصف بيتي لزك انام واني مأمن عليهم .. عمتي واكفه تكله ماله داعي احنه موجودين وزينب حالها حال اي ارمله تنتظر راتب رجلها يطلع وتكعد على بناتها وتسكت ..