Go to channel

قصص وروايات عراقية

12
عصبت راسي بخاولي من ريحه وكعدت اكطع كراعين ، للمغرب خلصناها ونظفناها ، وامي خلتها بجدر ضغط ابو القفل وياها نومي وراس بطل بكد جف الايد ورق غار و عود دراسين شوي كمون ، وخلطه سبع بهارات مادري منين تجيبها وتجيب وتكثر بهارات وتمطك بحلكها تضوك .. الواحد يحجي الحق امي محد يلحكها بالطبخ ، كضت عمرها هيه واهلها يطبخون بمحرم ، بالمواكب هريسه ، قيمه ، باجه ، كلشي يخطر على بال ، لحد ماوكعت بابا بيها بسبب اكلها بمحرم .. لليل رجع بابا دخل بقميصه الابيض والبنطرون القماش ، وخال المسطره طويله جوه اباطه والكتب بيده ، امبين جان بالمعهد يدرس خصوصي للطلاب ، شم ريحه ، صعدت ابتسامته كال صبولنه منها ، صبينه وخلينه صينيه كباله وطاسه روبه وثوم يمه يخوشك بيها ، سوده عليه وكع ميت عليها اوووف جنه يدري اخر مره اله .. ورها خلصنه وشلنه مواعين مينا عليها مواعين العشه ، اني اخذت كرار ادرسه رياضيات وامي طلعت تكوي ملابس بابا باجر لدوامه ، خاصه بعد ماقربت الامتحانات .. هو متعود كل سنه هيج وكت يزيد بضغطه على طلاب ، حتى يطلع نسبه كل سنه ، معروف عنه بالتربيه وبالمنطقه الاستاذ ناظم احسن مدرس رياضيات بالمنطقه كلها .. بابا لبس شحاطه وطلع يشوف عمتي خاف محتاجه شي هيه وعمي رضا .. وراه اندكت باب وطلعت ماما تشوف منو .. عبالها بابا رجع ناسي شي . اني سمعت الباب عبالي بابا ، بس من دخلت مينا تركض وتتجبح وتهمس ، ولج عمج هذااا عمج اجه بهل ليل .. كملت ليحلي مخروعه منوو .. عمج ابو احمد شبيج ثوله .. هاا ولج يااا شجابه ، كمت امشي داروح اشوف ، جرتني وين تعااي ، امج بالباب تحجي وياه ، هسه يجي ابوج ويعصب علينه .. لا بس اشوف دفعتها ومشيت ، وهيه صاحت وراي تعاي ماقبلت ارجع .. بس فزيت من سمعت صوت بابا يحجي وينتر بي ويكله شجابك اني مو كتلك لاتلفي يمي جعفر امشي منااا .. خفت وترددت امشي واشوف واسمع بس تجرئت ومشيت داشوف شكوو .. التفتت وراي مينا واكفه باب الغرفه خاله اديها على حلكها خايفه ، بسبب صوت بابا العالي بس تخاف تتقدم بس مدمعه من خوف .. مشيت وصلت باب المطبخ فكيتها شوي .. واشوف بابا نطه عمي دفعه ورجعه ليوره ، يكله مشاكلك ومصايبك ويه العفطه مالتك لاتقربها عليه ، رجال اني نظيف شجابني نجاستك ، ولي مناا لاتخليني اتبره منك بالقانون و بالعشاير .. بلعت ريكي خايفه ، عمي وجهه كله شرر واحمر ويرفع باصبعه يهدد ، وبابا يرد ويدفع بيده وينتر بي ، ويرجع بي ليوره يريده يطلعه من حديقه لباب خارجي يطرد بي .. ماما لازمته لبابا وتتوسل بي تكله عيب دخله منا العالم .. تالي جرر ماما ودفعها حيل ليوره وعاط بيها تدخل جوه .. اني كبل سديت باب المطبخ وطفرت ليوره لايشوفني وياااريت ماسادتها والله لليوم متندمه لان ماضليت واكفه ، .. ياريت ماتراجعت وشفت شكوو وشنو صار .. فزيت من خوفي على صرخه ماما وعيطه بابا بكلمه ااااخ .. التفتت بسرعه على مينا الي طكت بجي رجعت لباب ركض فتحتها وصوت صراخ ماما جمد دم بيه .. اشوف بابا مدد بالحديقه وراسه فايض دم واكع بالضبط على بلوكه الزينه مال حديقه شكلهم يصير مثلت .. ركضت عليه اعيط بابااااا؟؟؟! يتبع .....