Go to channel

قصص وروايات عراقية

13
- ايع بعينج ابوج بحياته ماواصل هنااك ، شوداه اليوم وعمتج من صبح مغبشه علينه ، وجهه اصفر حق تعرفين شكو ماكوو .. - انتي فضوليه .. اني فضوليه لو هذه شغلات لازم نعرفها عن عمنه ، بس اهلنا ساكتين ومايحجون ترى حقنه احنه مو صغار .. - اووي شعليينه.. - كبر اعدلي حلكج شهل فهاوي .. باوعتلي بطرف عينها تكوي بشعرها ودير بوجها للمرايه .. راح يعطب ارحمي شوي من كاويه .. - احبه سرح مي .. - ميحتاج هو ناعم على شنو تكوي هو بي كسره وحده .. - ماحبها اريده مثل شلال على كولت بابا من يحجي لاامي ابتسمت تعدل بالكذله .. مينا حلوه حيل ، مو اختي واحمد بيها لا والله تجنن جنها تركيه طالعه على امي مو مثلي على بابا ، الوجهه مدور بيضوي ، والحاجب من الله مرفوع والعيون ماتستقر على لون ، حسب الموسم وحسب لون الملابس ، بس بيها شي مو حلوه .. فهااااوه تكتل كتل الوجهه جامد ماتتحاجه ، الي يشوفها يكول رب الكبرياء ، بس والله كلبه فد طيب ، بس هيه جامده هيج من الله ، جنها امي بكلشي ... امي اصول اهلها ايرانيين اهواز ، اهلها ساكنين ايران .. قبل ال٧٠ جانو بالعراق بس بال٨٠ تركو العراق وراحو لايران ، واستقرو هناك عكس امي الي ضلت هنا لان مزوجه وهم لان ابوها عراقي فما رحلوها لا هيه ولا كرايبها .. واكفه واباوع عليها تعدل بنفسها ، متعجبه بروحها ، تاخذ الكذله هيج وترجعها هبج ، فريت ايدي الحمدلله وشكر فتحت كتبي اقره ، بابا لليل ومااكو خبر عنه ، طلعت لاامي اسالها عليه شو ماكوو... - راح العمج .. - ادري بس شوو طول شنو قصه .. -'شعليج انتي لاتدخلين .. - شنو مادخل اسال على بابا ضل بالي تكليلي ماادخل سأله على ابن جيران مثلا .. - رعنه احجي عدل لااكوملج .. - لا دخيلج مابيه حيل تغردين عليه بايراني . حيوووانااا سك ماددددده مدري شنوو .. - كامت لحيلها طفرت اركض للمطبخ ، منهزمه منها تلكاني كرار شايل طوبه اندرمت بي رجعت ليوره .. - هوووش شبيج جنج حايط .. - انجب ولك اختج جبيره وين جنت بهل مغربيه .. - بالطوبه وين اروح يعني . - وراك وزاري يااعين امك ماخذ راحتك بابا مو هناا .. درست ورحت والله شبيج .. تقربت منه اريد افتهم سالفه :- ماتدري بابا ليش راح لعمك .. - رفع جتفه ولا ادري شعليي اني .. - لاياابوي انته واختك عبالك ماعايشين هناا بهل بيت .. عافني وراح يسبح ، كعدت بالمطبخ افر سالفه براسي والله متت من فضول ، اعرف عمي عنده ثلاث بنات كبار ولد واحد هم جبير اكبر من عدي ب٥ سنوات تقريبا بس لاشايفتهم ولااعرفهم .. حتى ماسامعه صوتهم ، هاي نوبات امهم ادك على بابا بالسنه مره تشكيله من الي يسوي ، هو يردها مالي لازم ام احمد عدج اهل وروحي الهم خلي يطلكوج منه ، اخوي لااكدرله ولااعرف اتفاهم وياه صار سنين ، اخر اتصال الها جان قبل سنه دكت تبجي فزعتني من رديت على موبايل سمعت وحده وتستنجد بابا .. مافتهمت شي بس دخليك ابو مينا هذا جعفر راح يضيع البنيه تلاحك عليه .. توه ارد عليها بابا اجه واخذ جهاز مني ، ضليت واكفه وجهي باهت من خوف ، اخذ جهاز وطلع للحديقه عصبي ويحجي ويأشر بيه .. تالي وره ساعه سده منها وراح لعمتي ماعرف ليش ، صافنه واجت مينا فززتني هيووو مو احجي وياج .. - وجع فززتيني .. - مو وياج .. - شبيج مو شوفيني صاافنه .. - هنياله صافنه علي .. - انجبي .. تدرين اليوم منو شفت صدك .. - منوو .. - دتوسلي ويالله .. - لا عليج الله كولي .. -'شفت مازن رفعت بحواجبه .. رخت ملامح وجهه وردت خدودها . وين شفتي . - بالسياره من جنت طالعه للدوام هو هم باين عده دوام . جرت كرسي وتباوع للصاله خاف امي تجي لو تسمع .. قربت راسها مني وتحجي بهدوء.. - اووو شكد مشتاقتله والله ، صار شهرين مشايفته من تخرجت لحد هسه .. سكتت ، كتلها شفته مقهور حيل يشكي الحال يكول ماكو تعين .. - انتظره لحد ما يشتغل ويكون نفسه .. - تعيشين بعووزه معناها طول عمرج .. '-عوز ولا خير من الله بس لا سعيده ولا متعافيه .. ابتسمت، ماعرف ليش سالفه من توصل لمازن عقلج يشتغل ياسبحان الله .. ابتسمت بهدوء وسكتت ، تفر باطراف شعرها .. بيومها بابا مااجه ولا اكو منه خبر ، اني متت اكلني فضول والقلق عليه ، امي ولا يمها جنها تعرف سالفه لذلك مطمنه .. لل١٢ واني اكول هسه يجي ويدخل بس ماكوو .. ثاني يوم جمعه ، اجه بابا ب١٠ صبح الوجهه مزنبر واسمر من تعب ..كوه يحجي، اراقب بي وقلقه عليه حيل .. جبتله كلاص مي وانطيتهم امي كعدت كباله نتتظره يحجي مااحجه عافنه وكام سبح ولف راسه ونام .. ضل باليومين هيج خانس على كد الاكل وشغل وطلاب وكلامه قليل ، سوده عليه بابا من يومه من ينقهر يسكت ويخنس ..