Go to channel

قصص وروايات عراقية

11
راح للسوك وجاب عشه واجه ، عمي لليل واجه من يم عمتي ، كضاها يمنه سبوع ورجع لكربلاء لمرته وجهاله ، بابا بوقتها شال المسواك والهدايه ونطاهن ليتامه .. امي ضلت فتره كالبه الوجهه عليه شلون سوه هيج ، حتى عمتي شالت غراضها ونطتهن للفقره ، تكول شمدرينه منين جايبهن بعمرنه ماسوينه شي يغضب ربنا ، على تالي وكت ناكل حرام .. لمن نسأل ماما تكول ابوج وعمتج مو وجهه نعمه ، عمج يشتغل قريب الحوزه والعالم من تنذر وينطو نذر فلوس ، وابوج يكول هذني حرام مال عالم .. ماعرفنه صدك من جذب ، ضل عمي يم عمتي ثلاث ايام وراح زعلان من بابا ، اشوف بابا مقهور ومهموم من وراه بس شيسوي مابيده شي اخو الجبير ومايكدرله بعد .. بعدها فتره طويله ماشفناه ولا سمعنه عنه خبر ، تخرجت مينا وكعدت بالبيت حاول بابا يلكالها شغل وماكو ، اني الحمدلله والفضل الله ومن ثم بابا طلعت معدل بالرابع فرح بابا حيل ودخلت الخامس بتفوق كلها تكلي انتي هالسنه معفيه انشالله .. بابا جان متأمل بيه طبيه بس ماتوقع سنه عن سنه ، المواد تصعب والواهس يقل ، لزم خطيه ونقلني لمدرسه قريبه على دوامه ، مدرسه نموذجيه ، متأمل اطلع طبيه واني هم ماردت اخيب ظنه ابد ، جنت متحمسه حيل وشاده حيلي .. راح بابا بوقتها اخذ امي وطلع لليل يله رجع ، جايب النه كلاده ذهب توصى عليها اسمائنه ، وحده لمينا وعليها اسم الست مينا ، والثانيه الي وعليها دكتوره لتين .. صح خفيفه وتكلفتها ب٢٥٠ الف بس عدنا تسوه دنيا .. لان سواها النه خصيصا ودافع دم كلبه عليها ، لبستها ومن يومها مانزعت ولا فاركت ركبتي مره نكطعت ورجعت لحمتها عد صياغ ، وضليت محافظه عليها كلش ، دومها جوه ملابسي ماطلعها .. وراها بفتره بلش دوام ، بابا طاير بيه مكيف ، عمتي خطيه اشترتلي هديه ملابس وبابا ماقصر ، ضليت يوميه صبح اطلع اني وياه للدوام يوصلني ويرجع لحد ماا تعودت واعتمدت على نفسي .. بيوم من الايام دك عمي على بابا بس مارد عليه ، رجع يدك لليل وبابا مارد كال اكيد مسوي شي ويريدني اروحله ، ثاني يوم عمتي غبشت علينه من الصبح ، جنت توه مبدله اريد اروح للدوام وبابا هم .. جفتت علينه عمتي تلهث حجت لبابا على سريع اخوك مسجون ويريد واحد يكفله ويله يطلع ، يكول ادك على اخوج مايرد تالي دك على رجلي فضحنه جدامه فشلني والله .. ااندار عليه بابا لكاني واكفه اريد اسمع ، اشرلي امشي للدوامج بابا وراج اطلع اني .. طلعت من يمه واتلفت ، عبالي اسمع شي وافتهم كلشي ماكو ، بابا حيل حريص ميخلينه نتقرب ولا نعرف شي على عمي .. عفتهم ثنينهم واكفين بالباب يحجون واني تمشيت للشارع ، وكفت بالخمس دقايق وفاتت سياره صعدت بيها ، انداريت على يمنه لكيت مازن كاعد من شافني ابتسم ياااهلااا .. - ابتسمت هلا بيك وين هالغيبه .. - بالدوام والله تعرفين هندسه شو يرادلها وقت وخلك طويل . - صح والله بالتوفيق يارب .. - الله يسلمج سمعت من الوالده دخلتي المدرسه نموذجيه .. - اي والله شفت القسمه هاهيه الحمدلله .. - مابيها شي هم الحمدلله ، شدي حيلج الي وياج مو احسن منج ، بالكت تتخرجين وتتعينين ، طلعي كليه زينه وتعين مضمون بسرعه خما مثلنه .. هو هذا حال البلد ، المتفوق مال مكان بالدوله .. ذكرتيني من جنت امر ادرس عند ابوج خصوصي ويكلي مستقبلك انته بااهر تالي باهر راح يتعين واني لااا .. ضحكت الله كريم حتى لو ماكو تعين افتح ورشه تصليح .. الفلوس منين .. سكتت ودرت وجهي ، متأمله باجر احسن ، صح امل ضعيف بس نضحك بي على رواحنه حتى نعيش ، انداريت عليه لكيته مبتسم يباوعلي رجعت درت وجهي ، وصلت للدوام سلمت ونزلت .. مازن من اذكى طلاب بابا جان يدرس عنده خصوصي درجاته كلهن يحصلهن كاملات ، بس شاء القدر انو يتوفى ابو قبل الوزاري والتهه بالفاتحه .. حاول ياجل بس كلها رفضت كلوله جرب بالكت اطلع معدل .. وصدك نجح من اول دور وبمعدل ٩٠ بس شنو فايده مانقبل مجموعه طبيه ، هو هم ماعاد سنه رضه بقسمته وسكت ، وكمل هندسه حاليا مرحله اخيره ، انقهرت عليه واني اشوف هيج انسان تعبان على نفسه متمرمط ويأس من هالحياه وماعده اي حلم .. خفت يجي يوم واصير مثله ، مادريت القدر وحياه اقسى على بنت اكثر من الولد ، وراح اشوف الاتعس منه ، كملت دوامي وراسي مسطور ، رجعت للبيت بابا ماكوو ، توقعت تاخر بالدوام بس تفاجئت من امي كالت راح لعمج لكربلاء .. انصدمت بحياته بابا ماراح لكربلاء ابد ، حتى عمتي ، جيت اروح لعمتي وافتهم سالفه بس اكيد ماتحجي ولا راح تسولف ، وامي اذا اسالها كبل تنتر بيه .. مينا مثل ثوله اطرش بالزفه ، كل ماسالتها حجت بفهااوه ماادووري .. - اريد اعرف شتدرين متكوليلي .. - تردين اتصنت مثلج يعني ايع ..