كانت دار العز وطيب
وكاين فيها كل دلالي
وما في حد عليها يغيب
وياما شالت ناس غوالي
اليوم انجيها كي الغريب
اندق وما يفتحلي والي
ما نسمع غير صوت دبيب
ولوح ايخبط صوته عالي
انكملها عالباب نحيب
ايعذبني شريط خيالي
يخطر بويا عز حبيب
وجلساته كل وقت اقبالي
ولعبي قبل الشمس اتغيب
وغرفة نومي وكل امالي
الدار اللي في الخير تجيب
وديما رايق فيها بالي
فضيت فضاها النصيب
وهلها بين ايدين العالي
قلم .... نعيم الزوي