بان شيبنا والعمر عدا بينا
وبانن تجاعيد الزمان علينا
اليوم اكبرنا
وطاغى علينا الشيب ومحاصرنا
والعمر كيفلي خلاص دفرنا
في دنيته ما عاد شي يبينا
ثاقل سمعنا والعيون اخسرنا
والياس داير جيش لاعب فينا
وحتى المشيه مقوسين ظهرنا
وتسمع نفسنا وين ما تلاقينا
وزاد الثقيلة ما عليها اقدرنا
و لاعاد حاجة نرفعوا بيدينا
صابرين لنا الله فى حاضرنا
وجاهزين كان الموت تبى اتجينا
بقلم✍ نعيم الزوي