الى كل الزينبيات

مو كل إعجاب حب…✏️ بفترات هواي من حياتنا من وإحنا صغار لحد ما نوصل مرحلة الشباب كل واحد من عدنا يرسم صورة بخياله للشخص المناسب الشخص اللي نحسبه نصنا الثاني بالبداية أول شي يلفت نظرنا هو الشكل نربط الحب بالوسامة أو الجمال ونعتقد إن الإعجاب يكبر كل ما كانت الملامح أجمل بهيج مرحلة نكون متأكدين إن هذا هو الحب وما نعرف إننا بعدنا نتعلم ومع الوقت ومع أول صدمات الحياة تتغير الفكرة نكتشف إن الشكل يبهرك بالبداية بس ما يكفي حتى يكمل وياك الطريق لأن هواي وجوه حلوة تخدع وهواي ملامح مرتبة تخفي وراها طبع بارد أو ما تحب غير نفسها التجربة تعلمك إن مو كل شخص جميل هو إنسان جميل أكو ناس أول ما تحجي وياهم ترتاح حتى لو شكلهم عادي وأكو ناس شكلهم ملفت بس أول ما تقرب منهم تحس يثكل عليك وكأن روحك دا تكلك ابتعدو وهنا يبدأ الوعي الحقيقي تفهم إن الجمال مو بالعين الجمال بالقلب بالأسلوب بالكلمة بطريقة التعامل وبالاحترام وقت الزعل قبل وقت الرضا تفهم إن الإنسان اللي يطمنك ويخليك تكون على طبيعتك أحسن من ألف شخص يبهرك بسكوت أو مظهر ومع النضوج يتغير الطلب ما نرجع نريد شخص مثالي ولا فارس أحلام ولا شكل يخبل نريد إنسان صادق إذا وعد يوفي وإذا زعل ما يجرح وإذا حب حب بضمير نريد شخص وجوده أمان مو استعراض لأن بالنهاية الشكل يجذبك لحظة بس الإنسان الحقيقي هو اللي يبقى وياك العمر كله