الى كل الزينبيات

الحب كذبة صدقوها هواي ناس…✏️ خلوني أحجي وياكم بصراحة ومن غير مجاملة لأن هالموضوع دمر هواي ناس أكثر مما فادهم أول شي حب الموبايل أفشل قرار ممكن يتخذه الإنسان حب مبني على شاشة على كلام على وعود بدون واقع بدون مسؤولية بدون ضمان هذا النوع من الحب ما بي ثقة وكله شك وخوف وانتظار وينتهي غالبًا بخيبة وضياع وكت وعمر الإنسان بهالحب يتعلّق بشخص يمكن ما يعرفه أصلًا ما يعرف أخلاقه ولا تفكيره الحقيقي ولا شنو ممكن يسوي باجر مجرد صورة وكلام حلو وبالنهاية فراغ وألم تجون تكولولي: زين والحب الحقيقي؟ حتى الحب الحقيقي هم مو مثل ما متصورين نسبة قليلة جدًا اللي تنجح مو لأن الحب قوي بل لأن الأشخاص ناضجين واعين ومسؤولين غير هذا أغلب العلاقات تنتهي وتخلف وراها تعب قلق غيرة شك وتأثير نفسي طويل خل أگلكم رأيي بصراحة أكثر: أنا أشوف الحب بحد ذاته مو شي مقدس ولا ضروري بحياتك لا موبايل ولا غيره إذا عجبتك بنت إذا حسيت نفسك نعجبت بيها الطريق الصح و لمعروف باب بيتها وتقدملها غير هذا كله لعب بمشاعر وضياع وقت وتعلق بلا نتيجة فكروا شكد ناس تأذت نفسيًا ، انكسرت ، ضيّعت دراستها ، دمرت مستقبلها ، وبعضهم للأسف وصل لمرحلة الاكتئاب أو الانتحار شنو اللي استفادوه من الحب ولا شي غير وجع القلب الحب يخلي الإنسان يعيش بوهم يفكر بالشخص الي يحبه أكثر مما يفكر بنفسه بمستقبله بأهله بحياته يصحى وينام وهو همه شخص واحد مو أهدافه ولا طموحه نصيحتي الكم ركزوا على نفسكم على مستقبلكم وعلى بناء شخصيتكم قبل أي شي لا تخلون عاطفتكم تقودكم وتدمركم