الى كل الزينبيات

التناقض الفكري تناقض المشاعر وتشابه الاهتمام اليوم جايتكم بموضوع مهم راح اطرح ايجابيات الموضوع وسلبياته وشلون نسيطر علي هو الموضوع شاسع راح اخذ محور من محاوره وهو التناقض الفكري بين الحب والكره بالبداية لازم نعرف شنو هو الحب الحب بصورة عامه هو الاهتمام بشي ما والتفكير به يعني من نحب شي معين او شخص معين راح ننطي اهتمام ووقت زايد راح يأثر ع حياتنا بشكل مباشر و غير مباشر اضافه الئ انو الشي الي نحبه نتعامل ويا بكامل ارادتنا ونكون سعداء بهذا الشي هسه خلصنا من الحب نجي للطرف الثاني المتناقض الكره الكره شنو هوه الكره عكس الحب يعني من احب شخص اكون سعيد من اشوفه بينما اضوج اذا شفت شخص اكرهه المقصود بالكره هو تعبير عن عدم تقبل الشخص الاخر لحد هنا فهمنا الحب شنو الكره شنو اذا اسالك ليش تحب هاذا لشخص راح يكون جوابك ما ادري بس هو ينحب شكله و اخلاقه وكلامه كلهن ينحبن هذا يدل علئ انو المحبه هي فطرة داخل الانسان الله تعالئ وضع المحبه بداخل كل شخص وكل انسان حته يحب الاشياء ويشوفها بشكل اجمل اكو مقوله تكول الحب اعمى وهذا الشي صحيح لان الانسان تلقائيا من يحب شخص ما يشوف سلبياته لا يضل يحب كلشي هو يسوي يعني يتقبله بكل ايجابيته وسلبياتة اما الكره من تسأل شخص ليش تكره فلان اذا يعرفه راح يعددلك كل سلبياته واذا ما يعرفه راح يكلك ما ارتاحيتله احيانا من نسولف بفد مكان واحد من الموجودين يكول ذاك الشخص شكد اكرهة من تسئله تكله ليش تكرهه يكلك ما ينهضم وما احبه لان المحبه من الله صاير وياكم هذا الموقف طيب احنه ندري المحبة من الله الله خلق بينه المحبه حتى نحب بعضنا وماكو اي دين يقبل انو انت تكره شخص وماكو اي دين يأمرك انو تكره شخص المحبه من الله لكن الكره من عدنا احنه ما نكدر نقرر منو نحب بس نكدر نقرر منو نكره خلي نشوف الاسباب الي تخلينا نكره ومنو همه الي يكدرون يكرهوون اكو ناس متعودين ع هذا الشي ويتعايشون ويا كانو جزء مهم بحياتهم الموضوع المهم هو التشابه بين الحب والكره يعني انت من تحب شخص يكون الجزء الاكبر من اهتمامك اما من تكره شخص فـ راح تنطي نفس الاهتمام بس المشاعر تتغير من الحب الى كره 1- مثلا تروح لمكان تتنزه من تشوف شخص تحبه راح تفرح وتخلص الوقت متونس ويا اما من تشوف شخص تكرهه يتعكر مزاجك وتخلص الوقت ضايج وتكول هسه هذا شاجبه عليه وخرب طلعتي 2- من تسولف ويا شخص تحبه راح تبقه تتذكر سوالفه طول اليوم والابتسامه ع وجهك بينما من تسولف ويا شخص تكرهة تتذمر كلامه وتبقه ضايج 3- من تنام وتفكر بشخص تحبه تحلم بي حلم حلو بينما من تفكر بشخص تكرهة راح تحلم حلم مو حلو قريت خاطرة عجبتني تكول ان كنت تحبني او تكرهني المهم اني من ضمن اهتماماتك هذا وجه التشابه ببينهم خلصنا من هذا الحجي كله وهسه نجي للأيجابيات والسلبيات اكيد الحب طاقة ايجابيه واحساس حلو وما بي شي سلبي بعيدا عن علاقات الحب العاطفيه والفاشلة الكره ما بي شي ايجابي كله سلبي من تشوف شخص تكرهة تضوج وتكره الناس الي تحجي وياه تضل تحجي علي حته ترتاح بس بالعكس انت راح تضوج اكثر راح تضيع وقتك ع مود انسان تكرهة راح تتعب ع مود انسان تكرهة وفوك كل هذا حسناتك راح تروح لان تعتبر ماخذ غيبته بالمختصر الكره صفة سيئة ومابيها فائده وتضرك قبل لا تضر اي شخص ثاني حتئ تعيش مرتاح حب كل الناس حتئ الي يكرهكك سامح كل الناس حت تعيش مرتاح واذا ما تكدر تحب وتسامح ( لا تكره احد ) ماكو انسان ما ظلم وما تعاقب اذا انت تريد تعاقب الشخص الي يكرهك تحجي علي اذا حجيت علي ما راح يشفي غليلك واذا تسوي مثله راح يضيع حقك يم الله وتصير ظالم نفس فـ خلي الله يعاقبه لان الله اكبر واعظم حاكم احبو بعظكم لان الله محبه ما تردون نصير من احباب الله..... ✍️