1
وسألتها مرة بالزمنات: إنتِ كيف قوية لهاي الدرجة!
جاوبتني جواب غريب كثير بصراحة، ما عرفت معناه أوّل اشي، بس وقت شرحتلي آمنت بكُلّ حرف حكته
حكتلي: "كلّ دموع الضعف يلي بكيتها بيني وبين حالي، كل الإبتسامات يلي رافقت خيبات كانت تيجيني من ناس ما تخيلتها منهم، وكُلّ الضحكات يلي طلّعت مني لحتّى أخبي وجعي، كُلّ المرات يلي أجبرت حالي أمثّل فيها إني منيحة، وأنا فعليًا بتوجع من جوا وبعدها بنهار بس مش قدام الناس، وكُلّ مرة كنت أخبّي وجهي عن العالم وقت أحس ملامحي ممكن تخونني لحتّى ما يفكروا إنه سهل أنكسر".
لفت وجهها شوي وإبتسمت للفضاء وكملت:" كنت أجبر حالي أروح لأماكن مرتبطة بقصّص صعبة بالنسبة إلي، وأسمع كُلّ أغنية في إلها عندي ذكرى، كنت أجبر حالي على الوجع، لأني بعرف الوجع أولها مؤذي، ورح تحس بضعف، ومع الوقت رح يبطل في وجع، ورح يتحوّل لقوّة خيالية بحياتك ما تخيّلت تنزرع فيك، والضربة يلي ما بتكسرك! ... ".
سكتت زي كأنها بتستنى أكمّل، هون فهمت منبع قوتها.
ضحكتلها وحكيت: الضربة يلي ما بتكسرك بتولدك من جديد، ما بتقوّيك🖤 .