1
الطائفية.
.
طبعاً هواي يجوني كالوا احجي ع هج موضوع واجه وقته.
لان ديشكون من فلان شيعي يغلط ع سني وبالعكس.
هواي دنسمع انو فلان شيعي يكره السني وبالعكس.
او كردي او صائبي او مسيحي والخ..
شوف عزيزي/تي...
خلي مبدئك بالحياة من ناحية هاي الامور كلنا عبارة عن انسان واحد. والعراق واحد ميفرق بين سني او شيعي او غيرهم تمام.
كلنا اجينا لهلدنيا بسبب الخالق الي خلقنه وصورنا بأحسن تصوير.
فـ ماكو فرق بين هذا وذاك.
كلنا اخوه ان كنت من الجنوب او من الغربيه بالنهاية مرجعنا لرب واحد وكلمن يتحاسب ع اعماله بهلدنيا.
.
شعليك بالسني اذا ميحب اهل البيت عليهم السلام او ميروح يزور يااخي عليك بنفسك.
طبعاً اكو هواي اشخاص من الغربيه تروح تزور ومن ضمنهم اصدقائي الي اعرفهم سنه فـ لقصد شعلينه كلمن ومعتقداته وتقاليده لدخل نفسك بهيج امور.
احنه عدنا علي عليه السلام هم عدهم عمر ونتعارك ونتمالخ ونشتم بعض وثنينه ما مستفادين شيء ليش.؟
لان هم يتحاسبون وحدهم واحنه نتحاسب وحدنا.
.
خلونا ايد وحده نتشارك كلشي سوه صدكوني اني معاشر اهل الغربيه فد طيبين وينكرطون بس مو كلهم لان ماكو زوره تخله من الواويه.
وكذلك ترا الشيعه مو كلهم طيبين وينكرطون فـ لا نحجي ع غيرنا ونطلع روحنا كـ الملائكة.
خليك صاحب كرم وطيب واخلاق وسامح لان الله عزوجل بنفسه يسامح.
ومبيها شيء وكلشحلوه اذا شيعي زوج سنيه وبالعكس.
جوارينه شيعي وماخذله سنيه واهلها بالبصره وعايشين احله عيشه الله يوفقهم ويوفقكم.
.
اخيراً...
تستمر الحياة السني اخوي والشيعي اخوي مافرق بين واحد او واحد ثنينه نبينا واحد وربنا واحد.
وكلمن يتحاسب ع افعاله واعماله مراح اتحاسب كوني سني او شيعي.
( كلا للطائفيه ). ( العراق يجمعنا ).